«Туған жер» диктанты
8–11 сынып · 91 сөз · 11 сөйлем
Сайт мәтінді дауыстап оқиды: алдымен тұтас, сосын бөліп-бөліп баяу. Сен естігеніңді жазасың, қатең бірден түсіндіріледі.
Онлайн жазМәтінді көрсету (мұғалім мен ата-анаға)
Әр адамның жүрегінде туған жерге деген ерекше сезім болады.
Кіндік қаны тамған жер адамның есінен ешқашан шықпайды.
Алыс сапарға шыққан жолаушы туған өлкесінің самал желін, шөбінің иісін сағынады.
Туған жердің әр тасы, әр бұлағы адамға ыстық.
Кейде бір әуен, бір иіс бала кезді есіңе түсіреді.
Мұндай сәтте жүрегіңде сағыныш оянады.
Ұлы ақындарымыздың туған жерді жырларына арқау етуі де сондықтан болса керек.
Мұқағали Мақатаев Қарасазды, Ілияс Жансүгіров Жетісуды жырлады.
Ата-бабаларымыз жерін жаудан қорғап, ұрпағына аманат етіп қалдырды.
Ол аманатты көздің қарашығындай сақтау – біздің борышымыз.
Туған жерді сүю – елді сүюдің бастауы.